An Painéal maidir le soghluaisteacht foghlama

Chuir an Painéal Saoránach maidir le Soghluaisteacht Foghlama 21 mholadh ar fáil, a chuir leis an togra ón gCoimisiún le haghaidh an Mholta ón gComhairle ‘An Eoraip ag Gluaiseacht’. Tugadh aghaidh sa togra ar na moltaí ó na saoránaigh tríd neartú a dhéanamh ar an mbéim ar chur chun cinn na soghluaisteachta cuimsithí ar a bhfuil teacht ag cách, foghlaim teangacha a neartú, luach a saothair a thabhairt do na baill foirne a chuireann tionscadail soghluaisteachta foghlama i bhfeidhm, agus an tsoghluaisteacht foghlama a dhéanamh níos inbhuanaithe. 

Bhí Tuarascáil na Saoránach ag gabháil leis an togra ón gCoimisiún, tuarascáil a chuir na Ballstáit ar an eolas faoi mholtaí na saoránach. Ghlac an Chomhairle an Moladh ‘An Eoraip ag Gluaiseacht’ – deiseanna soghluaisteachta foghlama do chách. Is é is aidhm don Mholadh a chur ar a gcumas do níos mó daoine staidéar, oiliúint nó foghlaim sheachfhoirmiúil nó neamhfhoirmiúil a dhéanamh thar lear, ina measc sin daoine ar lú na deiseanna atá acu an méid sin a dhéanamh de ghnáth.

Idir an 28 agus an 30 Aibreán 2023, thionóil an Coimisiún Painéal Saoránach sa Bhruiséil don tríú seisiún, arbh é an seisiún deiridh freisin, den phlé maidir le conas deiseanna foghlama go dtí tíortha eile a leathnú do chách. Na smaointe a chuir na saoránaigh chun cinn, cuireadh chun cinn iad mar 21 mholadh nithiúla a raibh sé mar aidhm leo soghluaisteacht foghlaimeoirí, oideoirí agus ball foirne a éascú ó thír amháin go tír eile.

Agus é mar sprioc ghinearálta an timpeallacht foghlama a dhéanamh níos inrochtana do chách, leagtar béim sna moltaí ón bpainéal ar an tábhacht a bhaineann le feasacht ar dheiseanna a mhéadú tuilleadh agus rannpháirtíocht a spreagadh i measc daoine ar lú na deiseanna atá acu. Leagtar amach iontu freisin na deiseanna agus na dúshláin a eascraíonn as an digitiú agus déanann siad iniúchadh ar réitigh inbhuanaithe chun tionchar na soghluaisteachta ar an gcomhshaol a laghdú.

Le linn trí dheireadh seachtaine i mí an Mhárta agus i mí Aibreáin 2030, 150 saoránach a roghnaíodh go randamach d’aoisghrúpaí agus de chúlraí éagsúla ó na 27 mBallstát, phléigh siad agus shainaithin siad bacainní ar shoghluaisteacht foghlama i dtír eile.

D’iarr an Coimisiún Eorpach ar shaoránaigh cuidiú chun an tsoghluaisteacht foghlama san Eoraip a dhéanamh níos inrochtana do gach foghlaimeoir agus do gach oideachasóir agus chun cur leis an eolas atá acu uirthi. Bhí an painéal saoránach mar chuid de straitéis chomhairliúcháin níos leithne, a bhí dírithe ar thuairimí agus tograí a bhailiú ó na páirtithe leasmhara uile.

Iarradh ar shaoránaigh na pointí seo a leanas a chur san áireamh:

• An gá atá le grúpaí iomadúla foghlaimeoirí agus oiliúnóirí a áireamh, agus go háirithe, daoine ar lú ná an gnách na deiseanna atá acu (mar gheall ar mhíchumas, fadhbanna sláinte, bacainní eacnamaíocha, sóisialta, geografacha agus eile) agus grúpaí ar lú ná an gnách an tsoghluaisteacht atá acu, (amhail daltaí scoile agus múinteoirí, printísigh agus oiliúnaithe, foghlaimeoirí fásta agus oideoirí);
• an gá atá leis an tsoghluaisteacht a choimeád chomh neamhdhíobhálach don chomhshaol agus is féidir agus na modhanna taistil á roghnú agus cleachtais inbhuanaithe á gcur chun cinn, chun cuidiú leis an gcomhrac i gcoinne an athraithe aeráide;
• deiseanna agus dúshláin a d’fhéadfadh a bheith ag baint leis an digitiú (mar shampla, úsáid níos fearr a bhaint as ardáin dhigiteacha don fhoghlaim, don chumasc ar an láthair agus don fhoghlaim ar líne);
• acmhainneacht na soghluaisteachta foghlama don idirphlé idirchultúrtha, don tsaoránacht ghníomhach agus do chur chun cinn luachanna coiteanna.

Tá tuilleadh mionsonraí sa phacáiste eolais atá ar fáil sa rannán ‘Doiciméid’ thíos.