An Painéal maidir leis an bhFuath sa tSochaí a chomhrac

Le linn trí dheireadh seachtaine, tháinig 150 saoránach a roghnaíodh go randamach ó na 27 mBallstát uile le chéile chun plé a dhéanamh ar na cúiseanna atá le fuath san Aontas, sin agus an méid atá taobh thiar de. Phléigh siad freisin na réimsí éagsúla gníomhaíochtaí atá ann chun aghaidh a thabhairt orthu. 

I dteannta a chéile, tá sraith moltaí curtha ar aghaidh ag na saoránaigh a chuideoidh le dlíthe an Aontais amach anseo a mhúnlú agus a chuirfidh le tionscnaimh de chuid an Choimisiúin atá le teacht. Is féidir leat iad a fháil i rannán na ndoiciméad thíos.

Is féidir leat cur leis an Díospóireacht ar Líne atá ar siúl faoi láthair maidir leis an bhFuath sa tSochaí a chomhrac:

Iarrtar go sonrach sa Teachtaireacht ‘Ní ghlacfar leis an bhfuath’ go gcruthófaí spás idirphlé uile-Eorpach, ina dtabharfaí saoránaigh ó gach cearn den Aontas le chéile chun plé a dhéanamh ar bhealaí chun aistriú ón bhfuath agus ón deighilt chun taitneamh comhchoiteann a bhaint as ár luachanna Eorpacha, is iad sin an comhionannas, meas ar chearta an duine agus an dínit. Tá an Painéal Saoránach Eorpach maidir leis an bhFuath sa tSochaí a chomhrac ar cheann de na freagraí ar an nglao sin.

Bhí sé d’aidhm ag an bPainéal gníomhaíochtaí beartais féideartha a shainaithint, mar aon leis na gníomhaithe ábhartha uile ba cheart a bheith rannpháirteach ar leibhéil éagsúla, cinnteoirí, an tsochaí shibhialta, an earnáil phríobháideach agus saoránaigh ina measc.

Is é toradh deiridh an Phainéil liosta moltaí a thacóidh go háirithe leis an obair a dhéanfaidh an Coimisiún Eorpach amach anseo maidir le dul i ngleic leis an bhfuathchaint agus leis an bhfuathchoireacht. Beidh na moltaí ina dtreoir chun cabhrú leis an Aontas agus leis na Ballstáit bogadh ón bhfuath agus ón deighilt go dtí comhshochar luachanna Eorpacha, mar a chumhdaítear i gConradh an Aontais Eorpaigh. Áirítear orthu sin meas ar chearta an duine agus ar dhínit, agus sochaí ina bhfuil an chaoinfhulaingt, an neamh-idirdhealú agus an t-iolrachas i réim.