Painéal na ndomhan fíorúil

Idir an 21 agus an 23 Aibreán, d’óstáil an Coimisiún an seisiún deiridh den Phainéal Saoránach Eorpach um Dhomhain Fhíorúla sa Bhruiséil, seisiún a chuir ar chumas na saoránach moltaí a dhéanamh i dtaca leis na luachanna agus na gníomhaíochtaí is gá chun domhain fhíorúla Eorpacha a chruthú atá tarraingteach agus cothrom. Tacóidh na moltaí sin le hobair an Choimisiúin ar an saol fíorúil agus ar thodhchaí an idirlín.

Tar éis trí dheireadh seachtaine de phléití, rinne na saoránaigh 23 mholadh maidir le hionchais na bprionsabal agus na ngníomhaíochtaí lena chinntiú go mbeidh domhain fhíorúla san Aontas cothrom agus ábhartha do na saoránaigh. Tá na moltaí sin bunaithe ar ocht luach agus prionsabal, is iad sin: saoirse rogha, inbhuanaitheacht, duine-lárthacht, sláinte, oideachas, sábháilteacht agus slándáil, trédhearcacht agus cuimsiú.

Tá cuid mhór daoine ann a chreideann go bhféadfadh teacht chun cinn na ndomhan fíorúil, ar a dtugtar ‘meiteachruinní’ freisin, a bheith chomh suntasach céanna le teacht chun cinn an idirlín, agus go gcuirfidh siad athrú ó bhonn ar an mbealach a n-oibreoimid agus a rachaimid i dteagmháil le chéile sa todhchaí. Le cúpla bliain anuas – agus go háirithe ó phaindéim COVID-19 i leith – tá infheistíocht ollmhór á déanamh ag neart gníomhaithe poiblí agus príobháideacha sna réaltachtaí leathnaithe agus breisithe sin, mar a thugtar orthu, rud atá ag cur dlús le hathruithe inár n-ionaid oibre agus inár nósanna laethúla.

In ainneoin an mhéadaithe atá tagtha ar an aird ar na domhain fhíorúla, ní thar oíche a tharlóidh athrú mór den chineál sin. Tógfaidh sé blianta forbairt a dhéanamh ar na domhain fhíorúla le go mbeidh siad ina dtimpeallacht dhigiteach réalaíoch ar ardchaighdeán, agus níl aon léargas soiléir ann fós ar an gcuma a bheidh ar na meiteachruinní nó cad ba cheart a bheith iontu.

Tá an tAontas agus a Bhallstáit tiomanta leas a bhaint as acmhainneacht an mhórathraithe sin agus na deiseanna a ghabhann leis a thuiscint, ach ag an am céanna na rioscaí agus na dúshláin a bhaineann leis a thuiscint freisin, agus cearta shaoránaigh na hEorpa a chosaint lena linn. Dá bhrí sin, tá cinneadh déanta ag an gCoimisiún Eorpach painéal saoránach a thionól chun moltaí a cheapadh ar mhaithe le domhain fhíorúla a fhorbairt.

Tá tuilleadh mionsonraí sa phacáiste eolais atá ar fáil sa rannán ‘Doiciméid’ thíos.