Painéal Saoránach maidir leis an Athléimneacht Dhaonlathach

Tá brú ar dhaonlathais na hEorpa a bhfuil méadú ag teacht air, ó theannas geopholaitiúil agus athrú tapa teicneolaíoch go polarú agus laghdú ar mhuinín agus ar rannpháirtíocht an phobail. Tá saorthoghcháin chóra, an tsaoirse chun tuairimí a nochtadh, na meáin, iriseoirí agus an tsochaí shibhialta faoi bhagairt níos mó ná riamh freisin.

Chun aghaidh a thabhairt ar bhagairtí ar an daonlathas a bhfuil méadú ag teacht orthu, chuir an Coimisiún Eorpach an Sciath Eorpach don Daonlathas i láthair in 2025, in éineacht le bearta nithiúla chun an daonlathas a chumhachtú agus a neartú ar fud an Aontais.

Mar chuid den iarracht níos leithne sin, tiocfaidh 150 saoránach le chéile a roghnaíodh go randamach ó gach ceann de 27 mBallstát an Aontais chun plé a dhéanamh ar na príomhcheisteanna seo a leanas:

• Conas is féidir linn ár ndaonlathais a dhéanamh níos láidre agus níos athléimní, i dteannta a chéile? 
• Agus do thaithí féin agus an Sciath Eorpach don Daonlathas mar dhúshraith, cad ba cheart don Aontas a dhéanamh ionas gur féidir linn go léir páirt a ghlacadh sa daonlathas ina mairimid agus é a mhúnlú?

Braitheann an daonlathas, is é sin rialú ag na daoine agus ar son na ndaoine, ar shaoránaigh a bheith in ann páirt fhóinteach a ghlacadh ann. Mar sin féin, tá cineálacha éagsúla brú ar dhaonlathais an lae inniu a d’fhéadfadh a chur ina luí ar dhaoine nach bhfuil siad chomh heolach céanna, nach bhfuil siad nasctha agus nach dtugtar aird ar a dtuairimí.

Sa ghnáthchaint, is éard a chiallaíonn athléimneacht dhaonlathach cumas an daonlathais, cuir i gcás a institiúidí, an tsochaí shibhialta, saoránaigh agus pobail, ullmhú do bhagairtí nó do ghéarchéimeanna, iad a sheasamh agus téarnamh uathu, agus saorthoghcháin, an smacht reachta, cearta bunúsacha agus cumas daoine páirt a ghlacadh sa saol poiblí á gcoinneáil an tráth céanna. 

Ní féidir le rialtais ná le hinstitiúidí an athléimneacht dhaonlathach a fhorbairt ina n-aonar. Teastaíonn saoránaigh agus pobail freisin. Tugann an Painéal Saoránach Eorpach deis do shaoránaigh ó gach cearn den Aontas cur leis an iarracht chomhroinnte sin agus cuidiú chun gníomhaíocht Eorpach a bheidh ann amach anseo maidir leis an athléimneacht dhaonlathach a mhúnlú.