Tionól na Saoránach Óg maidir le Pailneoirí

Cuireann meath na bhfeithidí pailnitheacha an infhaighteacht bia, an dúlra agus ár rathúnas amach anseo i mbaol. Tá roinnt tionscnamh curtha i bhfeidhm ag institiúidí an Aontais agus ag go leor tíortha, réigiún agus cathracha Eorpacha chun aghaidh a thabhairt air sin, ach tá go leor fadhbanna le sárú go fóill. 

Conas a réitímid dúshláin maidir le cur chun feidhme, agus conas a théimid ar aghaidh le gníomhaíochtaí nithiúla?

Níl sé éasca freagra a thabhairt ar an gceist sin, ach is ceist uaillmhianach í le díospóireacht a dhéanamh ina leith! Sin é an misean a cuireadh de chúram ar 100 Eorpach óg idir 18 mbliana agus 29 mbliana d’aois a roghnaíodh go randamach, a bheidh ag teacht isteach sa Tionól chun réitigh agus moltaí beartais a cheapadh ó mhí Mheán Fómhair 2025 go mí an Mhárta 2026. 

Ach ós rud é go ndéanann an fhadhb sin difear do gach duine, is mian linn an díospóireacht a oscailt do gach saoránach. 

Léigh leat chun a fháil amach conas is féidir leat páirt a ghlacadh sa phlé agus cén fáth a bhfuil tábhacht leis. 

Ós rud é go bhfuil ár saol fite fuaite go mór le cinniúint na bpailneoirí, ba cheart na cinntí maidir lena bhfuil le déanamh a bheith ina n-ábhar díospóireachta poiblí leithne.

Is ceist í slándáil an tsoláthair bia a bhfuil tábhacht eiseach ag baint léi, ach tá iarmhairtí tábhachtacha cultúrtha agus eacnamaíocha ag baint leis an gcineál bia a tháirgimid agus leis an gcaoi a dtáirgimid é. Beidh tionchar ag cosaint na bhfeithidí sin freisin maidir leis an dóigh a mbainistímid limistéir ghlasa, ónár ngairdíní príobháideacha, trí na páirceanna poiblí go dtí na hanaclanna dúlra. Ar an dóigh chéanna le go leor gnéithe eile den ghéarchéim chomhshaoil, is díol machnaimh é an meath ar na feithidí pailnitheacha ar cheisteanna níos mó faoin gcaidreamh idir ár sochaithe agus an domhan beo.

Is cinnte go bhfuil lámh ag daoine óga sa díospóireacht seo, ós rud é go gcaithfidh siad an chuid is mó dá saol ag plé le hiarmhairtí na géarchéime agus na gcinntí a dhéanaimid – nó nach ndéanaimid – inniu. Sin an fáth a bhfuiltear ag iarraidh ar shaoránaigh óga teacht le chéile sa Tionól. Ach ó tharla go bhfuil an plé sin ábhartha dúinn go léir, is spás a bheidh san ardán seo do gach duine le haghaidh malartú níos leithne.

Cuirfidh comhaltaí óga an Tionóil tús lena n-aistear trí fhoghlaim faoi na príomhdhúshláin a bhaineann le caomhnú na bpailneoirí. 

Ach díreofar an chuid is mó dá gcuid ama ar dhearcthaí éagsúla a phlé, ar thobsmaointeoireacht a dhéanamh ar réitigh agus ar chineálacha nua de chur chuige a phlé chun dul i ngleic leis na dúshláin. 

Chun tuiscint níos fearr a fháil ar an gcomhthéacs polaitiúil agus sóisialta, rachaidh comhaltaí an Tionóil i dteagmháil freisin le polaiteoirí, le páirtithe leasmhara agus le gníomhaithe na sochaí sibhialta.  

Ar deireadh, forbróidh siad moltaí d’institiúidí an Aontais, do lucht cinnteoireachta eile agus do pháirtithe leasmhara ábhartha chomh maith. 

Deis atá sa Tionól chomh maith chun machnamh a dhéanamh ar ról na hóige laistigh de rialachas saincheisteanna comhshaoil ar leibhéal an Aontais, in éineacht leis na hinstitiúidí Eorpacha, le fís fhadtéarmach.