Painéil Saoránach Eorpach

Painéil Eorpacha na Saoránach

Céim nua i rannpháirtíocht na saoránach

Tá an Painéal Saoránach Eorpach maidir leis an bhFuath sa tSochaí a chomhrac ar siúl faoi láthair

Tháinig 150 saoránach as gach cearn den Eoraip le chéile don Phainéal Saoránach Eorpach maidir leis an bhFuath sa tSochaí a chomhrac.

I dteannta a chéile, déanann siad plé ar na dearcthaí agus na léirithe éagsúla fuatha atá ann inniu, sin agus ar na bearta is féidir a dhéanamh chun aghaidh a thabhairt ar ghníomhartha fuatha sa tsochaí.

Ag deireadh an Phainéil i mí na Bealtaine, tiocfaidh na saoránaigh ar chomhaontú maidir le sraith moltaí a chuirfear faoi bhráid an Choimisiúin Eorpaigh, a mbeidh tionchar acu ina dhiaidh sin ar bheartais ghaolmhara an Aontais.

Faigh tuilleadh eolais

Chuir an Painéal Saoránach Eorpach maidir le hÉifeachtúlacht Fuinnimh a mholtaí faoi bhráid an Choimisiúin Eorpaigh

two citizens hand over the final recommendations to Maroš Šefčovič, Executive Vice-President of the European Commission for the European Green Deal.

Ag deireadh sheisiún deiridh an Phainéil, chuir na saoránaigh a moltaí faoi bhráid Maroš Šefčovič, Leas-Uachtarán Feidhmiúcháin an Choimisiúin Eorpaigh um an gComhaontú Glas don Eoraip.

Le linn trí dheireadh seachtaine, tháinig 150 saoránach a roghnaíodh go randamach ó na 27 mBallstát uile le chéile chun plé a dhéanamh ar na dúshláin agus na buntáistí is ábhartha dóibh a bhaineann le héifeachtúlacht fuinnimh.

I dteannta a chéile, tá liosta moltaí nithiúla curtha ar aghaidh acu a chuideoidh le dlíthe an Aontais amach anseo a mhúnlú agus a chuirfidh le tionscnaimh de chuid an Choimisiúin atá le teacht. Orthu sin tá an togra atá beartaithe ag an gCoimisiún le haghaidh Moladh maidir le ‘Céadphrionsabal na hÉifeachtúlachta Fuinnimh’.

Faigh tuilleadh eolais

Cad iad na Painéil Saoránach Eorpach?

Is gné rialta den saol daonlathach san Aontas Eorpach (AE) iad na Painéil Saoránach. Saoránaigh a roghnaíodh go randamach as gach ceann de na 27 mBallstát, tagann siad le chéile ar na painéil chun plé a dhéanamh ar an leibhéal Eorpach maidir leis na príomhthograí a bheidh ann amach anseo agus a mbeidh tionchar acu orainn go léir.

Ar na Painéil Saoránach Eorpach oibríonn rannpháirtithe le chéile i ngrúpaí beaga (thart ar dháréag an ceann) agus go léir le chéile (i seisiúin iomlánacha). Cuireann foireann éascaithe tacaíocht ar fáil.Bunaithe ar an bplé, déanann na saoránaigh moltaí don Choimisiún Eorpach lena meas, agus beartais agus tionscnaimh á sainiú aige.

Ó lár mhí na Nollag 2022 go dtí deireadh mhí Aibreáin 2023, bhí deis ag trí phainéal a bhfuil thart ar 150 rannpháirtí i ngach ceann acu moltaí nithiúla a fhorbairt maidir le cuid de phríomhthionscnaimh Chlár Oibre 2023 an Choimisiúin. Sa chéad sraith de phainéil saoránach, thug na rannpháirtithe aghaidh ar shaincheisteanna a bhaineann le cur amú bia, domhain fhíorúla agus soghluaisteacht foghlama.

Cén dóigh a n-oibríonn Painéal Saoránach?

Seisiún 1
Smaointe a spreagadh
Is é cuspóir an chéad seisiúin smaointe a spreagadh agus na cineálacha cur chuige is fearr leis na saoránaigh a fhorbairt agus a ghrúpáil chun plé a dhéanamh orthu sna seisiúin atá le teacht.
Seisiún 2
Athbhreithniú agus mionchoigeartú
Is é sprioc an tseisiúin seo tógáil ar an gcur chuige a comhaontaíodh sa chéad seisiún agus moltaí tosaigh na saoránach a dhréachtú. Tar éis próiseas atriallach ‘piarmheasúnaithe’, déanann na saoránaigh, mar mheithleacha, athbhreithniú ar obair a chéile agus cuireann siad leis an obair sin, rud a spreagann smaointe eile. Is é an méid sin a bheidh mar bhonn ag an bpainéal chun a mholtaí deiridh a fhorbairt le linn an tseisiúin deiridh.
Seisiún clabhsúir
Conclúid
Leis an seisiún clabhsúir, cuirtear conclúidí na ndíospóireachtaí, mar aon le moltaí an phainéil, faoi bhráid an Choimisiúin Eorpaigh, mar chuid den phacáiste a ghabhann leis na tograí ábhartha.

Cén dóigh a roghnaítear saoránaigh?

Thart ar 150 saoránach ó na 27 mBallstát, a roghnaítear go randamach

Ionadaíocht a dhéanamh ar éagsúlacht an Aontais Eorpaigh – tíreolaíocht (uirbeach/faoin tuath), inscne, aois, oideachas, cúlra socheacnamaíoch

Is daoine óga iad 1/3 de na rannpháirtithe (16-25 bliana d’aois)

Sa ghlúin nua de na Painéil Saoránach, is trí roghnú randamach a earcaítear rannpháirtithe. Déantar teagmháil ar an nguthán le rannpháirtithe a d’fhéadfaí a earcú. Úsáideann earcaitheoirí uirlisí a ghineann uimhreacha gutháin bailí go randamach (uimhreacha gutháin shoghluaiste agus uimhreacha gutháin shuite araon san áireamh). Ar an gcaoi sin, is féidir teacht ar ghrúpa a bhfuil éagsúlacht ann. Chun a chinntiú go léirítear sochdhéimeagrafach an Aontais sna painéil a mhéid is féidir, cinntítear leis an bpróiseas go mbíonn an earcaíocht ionadaíoch.

Is éard atá sna spriocfhigiúirí earcaíochta sonraí a tugadh ó na nithe seo a leanas:

Eorabharaiméadar, suirbhé bliantúil an Aontais Eorpaigh ar thuairimí an phobail, agus
Eurostat, Oifig Staidrimh an Aontais Eorpaigh.

Cinntítear, le córas cuótaí, painéal atá cothrom ó thaobh inscne de, agus sonraítear gur daoine óga idir 16-25 bliana d’aois atá sa tríú cuid den phainéal. Saintréithe sochdhéimeagrafacha eile a chuirimid san áireamh, is leis na nithe seo a leanas a bhaineann siad:

leibhéal oideachais
suíomh geografach
gairm bheatha.

Earcaítear rannpháirtithe ó gach Ballstát i gcomhréir le daonra an Bhallstáit sin, agus ionadaíocht chionmhar thar ghrúpaí éagsúla á cinntiú san am céanna. I gcás tíortha beaga a bhfuil níos lú rannpháirtithe iontu, clúdaítear na catagóirí ar fud na bpainéal ionas go mbeidh ionadaíocht ag na tíortha beaga.

Déantar an próiseas roghnúcháin a athnuachan go hiomlán do gach painéal nua.

Tá sé ríthábhachtach painéil ionadaíocha agus éagsúla a earcú chun plé bríomhar a éascú agus chun a chinntiú go léireofar raon leathan dearcthaí agus tuairimí leis na pléití sin.

Painéil atá tugtha i gcrích

Painéal um an gcur amú bia

Cad iad na gníomhaíochtaí is ceart do Bhallstáit an Aontais, do ghníomhaithe i slabhra an tsoláthair bia, do shaoránaigh agus do pháirtithe leasmhara príobháideacha agus poiblí eile a dhéanamh chun dlús a chur leis an iarracht chun an cur amú bia a laghdú?