Baġit Ewropew ġdid adattat għall-ambizzjonijiet tagħna

Fil-ġimgħat li ġejjin, 150 ċittadin magħżula b’mod aleatorju mis-27 Stat Membru tal-UE se jiddiskutu l-baġit fit-tul il-ġdid tal-UE, li se jiġi propost mill-Kummissjoni f’Lulju 2025.

Hekk kif l-UE qed tħares ’il quddiem, qed iseħħu bidliet profondi għas-soċjetà, is-sigurtà, l-ekonomija u l-pjaneta tagħna. Il-baġit tal-UE għandu jkompli jtejjeb il-kwalità tal-ħajja u l-għajxien taċ-ċittadini, il-bdiewa, ir-riċerkaturi, in-negozji u r-reġjuni fl-Ewropa u lil hinn minnha. Fl-istess ħin, hemm bżonn jiġu indirizzati prijoritajiet urġenti bħad-difiża u s-sigurtà. 

U filwaqt li l-ħtieġa għal azzjoni tal-UE qed tikber, il-baġit tal-UE għandu riżorsi finanzjarji limitati. Għalhekk il-parteċipanti se jiffukaw fuq żewġ mistoqsijiet:  

• Fuq liema prijoritajiet għandu jintefaq il-baġit talUE fil-futur? 
• Liema tipi ta’ attivitajiet għandu jappoġġja l-baġit tal-UE biex jgħin fit-twettiq ta’ dawk il-prijoritajiet?

Il-baġit Ewropew fit-tul jiddefinixxi d-daqs tal-baġit u fuq xiex jintefaq għal diversi snin. Il-baġit fit-tul attwali hu għall-perjodu mill-2021 sal-2027 u jammonta għal EUR 1.2 triljun, li bejn wieħed u ieħor jirrappreżenta 1 % tal-PDG tal-UE. Dan jiżdied b’madwar EUR 800 biljun minn NextGenerationEU, li huwa strument temporanju biex jippromwovi l-irkupru mill-pandemija tal-COVID-19.  

Il-baġit Ewropew wera li jipprovdi r-riżultati liċ-ċittadini. Pereżempju, billi jiffinanzja proġetti u attivitajiet li jappoġġaw l-iżvilupp soċjali u ekonomiku tar-reġjuni Ewropej, li jappoġġaw lill-bdiewa u liż-żoni rurali, li jipproteġu l-ambjent u li jiġġieldu t-tibdil fil-klima, li jippromwovu t-tranżizzjoni diġitali tas-soċjetajiet tagħna, u li jappoġġaw ir-riċerka u l-innovazzjoni. U f’dawn l-aħħar snin sar vitali fi żminijiet ta’ kriżi, bħall-pandemija tal-COVID-19, l-invażoni Russa tal-Ukrajna, l-appoġġ għall-indipendenza enerġetika tagħna u l-appoġġ lill-Ukrajna.