Ionas go mbraithfidh muintir na hEorpa gur cuid den tionscadal Eorpach iad, ba cheart dóibh tairbhe dhíreach a bhaint as buiséad an Aontais, lena n-áirítear trí thionscadail phobalbhunaithe a chomhchruthú. Tá cineálacha cur chuige den sórt sin ann (e.g. modheolaíocht agus stampa CLLD; LEADER), ach is beag agus is fada idir iad. Sampla amháin de chur chuige pobalbhunaithe den sórt sin is ea pobail fuinnimh. Tá acmhainneacht shuntasach ann maidir le húinéireacht an phobail ar fhoinsí in-athnuaite fuinnimh san Aontas. Faoi 2050, meastar go bhféadfadh thart ar 45 faoin gcéad de tháirgeadh foinsí in-athnuaite fuinnimh a bheith faoi úinéireacht shaoránaigh an Aontais, agus d’fhéadfadh thart ar an gceathrú cuid díobh teacht trí phobail fuinnimh amhail comharchumainn. Measadh i staidéar eile go bhfuil acmhainneacht shóisialta 176 bhilliún euro ann faoi 2030 amháin a d’fhéadfaí a shaothrú ó shaoránaigh den Aontas ar mian leo infheistíocht a dhéanamh i gcomharchumainn fuinnimh, rud a d’fhágfadh go mbeadh acmhainneacht táirgthe chomhiomlán 195.805 GWh ann gach bliain. Faoi láthair, ní bhíonn baint ag formhór na bpobal fuinnimh le cistí an Aontais ós rud é go measann siad go bhfuil siad rófhada agus maorlathach. Trí Ionaid Ilfhreastail thiomnaithe, nó trí chabhair ó eagraíochtaí tacaíochta (e.g., Cónaidhmeanna náisiúnta na bpobal fuinnimh), ba cheart rochtain ar chistí an Aontais a shimpliú, a lárú agus a luathú.