Ní mór a chur san áireamh sa straitéis airgeadais tar éis 2027 an gá atá le saoránacht níos gníomhaí a chothú i bpróisis pholaitiúla na hEorpa. Sa chiall sin, ba cheart don bhuiséad níos mó acmhainní a leithdháileadh chun muintir na hEorpa ó gach cearn agus ó gach cúlra den Aontas a rannpháirtiú i dtodhchaí na reachtaíochta Eorpaí. Beidh gá le hacmhainní airgeadais ar mhórscála chun díospóireachtaí gníomhacha fadtéarmacha na saoránach ar ábhair a bhfuil tábhacht shóisialta ag baint leo ar an leibhéal Eorpach, ar an leibhéal náisiúnta agus ar an leibhéal réigiúnach a áirithiú. Ar an gcaoi sin, beifear in ann níos mó foirne agus saineolais a earcú agus teacht ar sciar i bhfad níos mó de dhaonraí na mBallstát agus réitigh á lorg a mhúnlóidh ár dtodhchaí choiteann. Leis na próisis a spreag an Chomhdháil ar Thodhchaí na hEorpa, leagadh síos caighdeáin nua cheana féin maidir le rannpháirtíocht shibhialta san Aontas, ach ní féidir ach le creat airgeadais níos uaillmhianaí a chinntiú go n-éireoidh leo ar an scála atá de dhíth ar an Eoraip agus atá tuillte aici.