Ní mór tacú le foraoisí mar cholún lárnach de thodhchaí na hinfheistíochta glaise san Eoraip. Tá sé ríthábhachtach leithdháileadh cothrom airgeadais atá tiomnaithe d’fhoraoisí a chomhtháthú mar earnáil straitéiseach chun cuspóirí Eorpacha na hathléimneachta in aghaidh an athraithe aeráide, an iomaíochais agus an aistrithe éiceolaíoch a bhaint amach. Ní mór an tacaíocht sin a phleanáil ó chéim na tógála buiséadaí, nasctha leis na hiarrachtaí a rinneadh agus leis an bhfeidhmíocht a baineadh amach, agus ní mór é a bheith d’aidhm aici an méid seo a leanas a dhéanamh: cúiteamh cóir ar shrianta, sásraí maoiniúcháin leordhóthanacha le haghaidh aistriú cóir pobal áitiúil, oiriúnú don athrú aeráide, athchóiriú éiceachóras, caomhnú na bithéagsúlachta, chomh maith le hinfheistíochtaí i réitigh dhúlrabhunaithe (NBS), a chuireann go díreach le héagsúlú an gheilleagair áitiúil agus le forbairt bithgheilleagair chiorclaigh foraoise a bheidh in ann fás eacnamaíoch inbhuanaithe a ghiniúint. Ní mór éagsúlacht na ndálaí agus na ndúshlán ar fud na réigiún a léiriú i dtacaíocht bhuiséadach an Aontais, ag brath ar na cúraimí agus na dúshláin a bhíonn rompu – cúraimí agus dúshláin a bhíonn míchothrom go minic – i ndáil le táscairí feidhmíochta. Ní féidir na cuspóirí maidir le hEoraip aontaithe athléimneach a bhaint amach ach amháin trí chur chuige cothrom atá saincheaptha do riachtanais shonracha agus d’iarrachtaí sonracha.