Is éifeachtaí an dlúthpháirtíocht idirghlúine laistigh den teaghlach, arb é an príomhsholáthraí tacaíochta i gcónaí é do leanaí cleithiúnacha, do dhaoine fásta óga agus do dhaoine scothaosta a bhfuil cúram de dhíth orthu. Dá bhrí sin, tá beartais teaghlaigh ríthábhachtach chun aghaidh a thabhairt ar an tsaincheist sin. Ar an dara dul síos, baineann cothroime idirghlúine leis an gcaoi a leithdháiltear acmhainní airgeadais agus cumhacht chinnteoireachta ar aoisghrúpaí éagsúla, ach freisin leis an gcaoi ar féidir le daoine aonair rannchuidiú le samhail den stát leasa shóisialta atá cothrom ó thaobh aoise de. Mar shampla, d’fhéadfadh socruithe scoir agus/nó socruithe solúbtha oibre níos déanaí ag aois níos sine cabhrú leis an ualach airgeadais ar chórais phinsin a laghdú. Mar sin féin, le bheith cothrom, ba cheart go gcuirfí san áireamh leis sin cumas daoine aonair oibriú níos faide, e.g. ag brath ar a stádas sláinte, ar a staid teaghlaigh, ar a n-oideachas, ar dheiseanna foghlama ar feadh an tsaoil agus ar rochtain ar mhargadh an tsaothair. Ba cheart a chur san áireamh i mbeartais an teaghlaigh agus an mhargaidh saothair araon go bhfuil ár dteaghlaigh ag éirí níos éagsúla i dtéarmaí tréithe sochdhéimeagrafacha mar aois, sláinte, comhdhéanamh teaghlaigh, oideachas nó eitneachas. Beidh tionchar aige sin ar chumas teaghlach éagsúil i réigiúin agus in áiteanna éagsúla dul in oiriúint don mhargadh saothair nó do dhúshláin nua amhail an t-athrú aeráide. Tá idirphlé idirghlúine ríthábhachtach, agus leasanna, taithí agus dearcthaí daoine de gach aois á gcur san áireamh, chun a áirithiú nach bhfágfar aon ghlúin ar lár.