Cuireann Geilleagar na Dea-Bhaile samhail chlaochlaitheach ar fáil chun a chinntiú nach gcuirfidh iarmhairtí chinntí an lae inniu ualach ar na glúnta atá le teacht. Is minic a bhíonn costais fhadtéarmacha shóisialta, sláinte agus chomhshaoil mar thoradh ar fhás eacnamaíoch neamh-inbhuanaithe, rud a chuireann folláine na nglúnta atá ann faoi láthair agus na nglúnta atá le teacht i mbaol, agus inbhuanaitheacht ár bpláinéid. Bogann Geilleagar na Dea-Bhaile níos faide ná OTI mar an t-aon tomhas ar dhul chun cinn, ag comhtháthú táscairí mar shláinte mheabhrach agus choirp, inbhuanaitheacht chomhshaoil, agus cothromas sóisialta. Trí gheilleagar na dea-bhaile a leabú i gcinnteoireacht an Aontais, cuideofar le haghaidh níos fearr a thabhairt ar na dúshláin atá ann faoi láthair agus riachtanais agus cearta na nglúnta atá le teacht á gcosaint ag an am céanna. Leis an gcur chuige sin, cuirtear cothroime idirghlúine chun cinn trína chinntiú nach gcuirfidh roghanna an lae inniu isteach ar chumas rathú na nglúnta atá le teacht. Is féidir teacht ar choincheap Gheilleagar na Dea-Bhaile i dtionscnaimh éagsúla de chuid an Aontais: Conclúidí 2019 maidir le Geilleagar na Dea-Bhaile, tuarascáil 2024 ón Airmheán Comhpháirteach Taighde maidir le ‘Folláine Inbhuanaithe agus Chuimsitheach’. Lasmuigh den Aontas, ba í an Bhreatain Bheag an chéad tír a chosain leasanna na nglún atá le teacht le ‘The Well-being of Future Generations Act 2015’ [Acht um Fholláine na nGlún atá le teacht 2015]. Tá dea-chleachtais maidir le Geilleagar na Dea-Bhaile bailithe ag EuroHealtNet, an chomhpháirtíocht don tsláinte, don fholláine agus chun éagothromaíochtaí a laghdú, agus mhol sé an Seimeastar Eorpach a úsáid mar shásra chun Geilleagar na Dea-Bhaile a bhaint amach, rud atá ríthábhachtach chun go n-éireoidh leis an Tionscnamh Cothroime Idirghlúine.