Laistigh den Aontas Eorpach, mar atá in áiteanna eile ar domhan, tá easpa muiníne ann mar gheall ar an deighilt idir cathracha agus tíortha agus idir cultúir éagsúla. Cuirtear bac ar an dlúthpháirtíocht agus ar an gcomhtháthú, ar príomhghnéithe de bheartas réigiúnach an Aontais iad, mar gheall ar chorraíl shóisialta agus uaireanta déantar imeaglú orthu nuair a cheadaítear don pholarú oibriú gan bhac. Dá bhrí sin, ní mór an beartas réigiúnach a bheith ina dhlúthchuid de bhuiséad nua an Aontais. Is é bunús na dlúthpháirtíochta agus an chomhtháthaithe poist nua agus gnólachtaí nua a chruthú, chomh maith le comhtháthú sóisialta idir saoránaigh an Aontais. Le blianta fada anuas, d’éirigh go measartha maith leis an mbeartas réigiúnach, ach is féidir feabhas a chur ar bhaint amach na gcuspóirí má chruthaítear samhail choiteann measúnaithe tionscadail d’údaráis bhainistíochta thíortha uile an Aontais. Na difríochtaí atá ann faoi láthair maidir leis an gcaoi a ndéanann tíortha éagsúla measúnú ar smaointe tionscadail, cuireann siad le heaspa soiléireachta maidir leis na cuspóirí a bhaint amach. Ní mór éilimh níos airde a chur ar úinéirí tionscadail freisin ó thaobh maoiniú leanúnach de nuair a bheidh deireadh le maoiniú ón Aontas. Tá an iomarca tionscadal maith dúnta mar gheall ar easpa éilimh ar mhaoiniú leanúnach.