Mar shaoránach den Aontas Eorpach, thaistil mé ar fud na mBallstát le haghaidh staidéir agus laethanta saoire araon. Le linn mo chuid taistil, bhí sé deacair orm an córas iompair phoiblí a nascleanúint i dtíortha éagsúla. Is amhlaidh atá toisc go bhfuil a córas iompair phoiblí féin ag gach tír, le haipeanna, rialacha agus modhanna íocaíochta ar leithligh. Cruthaíonn na difríochtaí seo mearbhall, agus roghnaíonn go leor taistealaithe seirbhísí mar Uber nó Bolt in ionad busanna nó traenacha a úsáid — go háirithe agus iad ag fanacht sa tír ar feadh tréimhse ghearr. Chun é sin a réiteach, molaim aip aontaithe iompair phoiblí de chuid an Aontais a chruthú a oibreoidh ar fud na mBallstát uile. Ba cheart don aip cead a thabhairt d’úsáideoirí bealaí a phleanáil, ticéid a cheannach, agus rochtain a fháil ar fhaisnéis do bhusanna, do mheitreo agus do thraenacha gan córais nua a fhoghlaim i ngach tír. D’fhágfadh sé sin go mbeadh sé i bhfad níos éasca iompar poiblí a úsáid laistigh de na Ballstáit agus ar fud na mBallstát araon. Ní hé an sprioc atá ann na haipeanna náisiúnta atá ann cheana don iompar poiblí a ionadú, ach ardán roghnach ar leibhéal an Aontais a chur ar fáil lena simplítear an taisteal do thurasóirí, do mhic léinn agus do shaoránaigh. Chuirfeadh sé taisteal níos inbhuanaithe chun cinn freisin, ós rud é gur dócha go roghnóidh daoine iompar poiblí thar charranna príobháideacha nó cuideachtaí tacsaí nuair is féidir leo aip shimplí aontaithe amháin a úsáid.