Is díol sásaimh don Fhóram Eorpach maidir leis an Míchumas (EDF) tiomantas an Choimisiúin Eorpaigh don chothroime idirghlúine agus glacadh straitéise maidir leis an ábhar. Tá eisiamh agus idirdhealú fós os comhair daoine faoi mhíchumas de gach aois san Aontas, agus tá bacainní éagsúla os comhair daoine óga agus daoine scothaosta faoi mhíchumas a dteastaíonn gníomhaíochtaí spriocdhírithe uathu. Chun go mbeidh rath ar an tsochaí, ní mór daoine faoi mhíchumas de gach aois a chur san áireamh i ngach plé a bhaineann le cothroime idirghlúine. Is fíor sin go háirithe i gcás daoine scothaosta faoi mhíchumas, a bhfuil saincheisteanna éagsúla rompu a bhaineann le rochtain ar chúram sláinte, tacaíocht don mhaireachtáil neamhspleách, cosaint a n-inniúlachta dlíthiúla, agus tithíocht inacmhainne agus inrochtana. Tacaíodh le EDF leis an nglao ar phlean gníomhaíochta sonrach maidir le haoiseachas nach mór daoine faoi mhíchumas a áireamh ann. Ba cheart an Plean Gníomhaíochta a bheith ina dhlúthchuid de Straitéis an Aontais maidir le Cothroime Idirghlúine, bunaithe ar chearta an duine, ar an trasnachas, ar an gcomhionannas agus ar an dlúthpháirtíocht laistigh de na glúnta agus eatarthu. Ba cheart go n-áiritheodh sé comhleanúnachas idir gealltanais an Aontais agus na mBallstát maidir le cearta comhionanna do gach aois. Ina theannta sin, tá guth na hóige faoi mhíchumas ríthábhachtach chun go mbeidh sochaí rathúil ann. Ó rochtain ar oideachas príomhshrutha, fostaíocht, gníomhaíochtaí cultúrtha, tithíocht- tá a ndúshláin féin roimh dhaoine óga faoi mhíchumas freisin mar gheall ar easpa cuimsithe agus neamhionannais.