L-UE għandha toħroġ mill-“istat ta’ minoranza” li tinsab fih fil-livell internazzjonali, u fl-aħħar issir struttura federali, b’demokrazija akbar u b’baġit iffinanzjat bil-mezzi tagħha stess. B’mod partikolari, l-UE trid tkun tista’ tiddependi fuq id-dħul mit-taxxa tagħha stess u, fuq kollox, trid tkun tista’ toħroġ titoli ta’ dejn (ferm lil hinn mil-limiti attwalment previsti min-NextGenerationEU). Naturalment, baġit bħal dan irid ikun akkumpanjat minn demokratizzazzjoni tal-istituzzjonijiet (federali) Ewropej, li tagħti setgħat akbar lill-Parlament u tittrasforma lill-Kummissjoni fi gvern federali ġenwin taħt il-kontroll taċ-ċittadini Ewropej.