Biex iċ-ċittadini żgħażagħ jagħmlu aktar użu mill-portali, dawn iridu jsiru aktar viżibbli u aċċessibbli. Linja baġitarja biex tinħoloq applikazzjoni mobbli, intuwittiva u interattiva, se tiġbed l-attenzjoni tagħhom. Fl-istess ħin, l-attivitajiet Ewropej ta’ sensibilizzazzjoni fl-iskejjel u fiċ-ċentri taż-żgħażagħ jistgħu jqajmu kuxjenza dwar il-portali u l-opportunitajiet tagħhom. Huwa essenzjali wkoll li tiġi żgurata l-parteċipazzjoni taċ-ċittadini żgħażagħ fid-diskussjonijiet politiċi permezz ta’ kwoti, filwaqt li jiġi żgurat li tiġi rrappreżentata diversità ta’ profili, inklużi dawk ’il bogħod mill-isfera politika. Nipproponu baġit sabiex l-istudenti jkunu jistgħu jsegwu u jibbenefikaw minn workshops u ħarġiet pedagoġiċi li jippermettulhom jiltaqgħu ma’ membri tal-istituzzjonijiet Ewropej biex jiskopru l-ħidma li saret fil-livell ta’ dawn il-korpi u jgħinuhom jiżviluppaw il-kurżità tagħhom u jesprimu ruħhom b’mod miftuħ f’suġġetti ta’ interess dirett għalihom. Din il-loġika edukattiva għandha twassalna biex ma nillimitawx ruħna għall-edukazzjoni sekondarja, iżda biex insegwu dan l-approċċ għall-edukazzjoni għolja. Nappellaw għal żieda fil-finanzjament għar-riċerka xjentifika. Ir-riċerkaturi fil-bidu tal-karriera tagħhom jiltaqgħu ma’ diffikultajiet f’termini ta’ finanzjament. Finanzjament addizzjonali jinkoraġġixxi lir-riċerkaturi żgħażagħ biex isegwu karrieri fl-Unjoni Ewropea.