Fl-UE, bħal f’partijiet oħra tad-dinja, il-polarizzazzjoni bejn il-belt u l-pajjiż u bejn kulturi differenti ħolqot nuqqas ta’ fiduċja. Is-solidarjetà u l-koeżjoni, li huma elementi ewlenin tal-politika reġjonali tal-UE, jinżammu lura minn inkwiet soċjali u xi drabi minn intimidazzjoni meta l-polarizzazzjoni titħalla topera liberament. Għalhekk, il-politika reġjonali għandha tkun parti integrali mill-baġit il-ġdid tal-UE. Il-bażi għas-solidarjetà u l-koeżjoni hija l-ħolqien ta’ impjiegi ġodda u negozji ġodda, kif ukoll il-koeżjoni soċjali bejn iċ-ċittadini tal-UE. Għal ħafna snin, il-politika reġjonali rnexxiet relattivament tajjeb, iżda l-kisba tal-objettivi tista’ tittejjeb jekk jinħoloq mudell komuni ta’ valutazzjoni tal-proġetti għall-awtoritajiet maniġerjali tal-pajjiżi kollha tal-UE. Id-differenzi attwali fil-mod kif pajjiżi differenti jivvalutaw l-ideat tal-proġetti jikkontribwixxu għal nuqqas ta’ ċarezza fil-kisba tal-objettivi. Għandhom isiru wkoll domandi akbar fuq is-sidien tal-proġetti f’termini ta’ finanzjament kontinwu wara li jkun intemm il-finanzjament tal-UE. Ingħalqu wisq proġetti tajbin minħabba nuqqas ta’ talbiet għal finanzjament kontinwu.