Permezz tal-QFP li jmiss, l-UE trid turi li għadha konnessa maċ-ċittadini tagħha u impenjata li tappoġġa lill-komunitajiet. B’mod partikolari, irid ikun hemm enfasi fuq l-appoġġ għan-nies u l-komunitajiet li jirriskjaw li jitħallew lura ekonomikament. L-istrument primarju tal-UE għall-appoġġ tal-iżvilupp lokali mmexxi mill-komunità huwa l-Programm LEADER, li wera fuq perjodu ta’ aktar minn 30 sena li huwa mod effettiv ħafna biex il-komunitajiet jingħataw l-għodod biex jieħdu s-sjieda tal-iżvilupp tagħhom stess. Intwera wkoll li l-metodoloġija minn isfel għal fuq ta’ LEADER twassal għal benefiċċji sekondarji importanti, bħall-bini tal-kapital soċjali u l-koeżjoni soċjali fi ħdan il-komunitajiet, u t-tqarrib tal-Ewropa lejn iċ-ċittadini tagħha. B'dan f'moħħna, nagħmlu r-rakkomandazzjonijiet li ġejjin: - Il-finanzjament ġenerali għal-LEADER/għas-CLLD għandu jiżdied fi ħdan il-QFP li jmiss. - L-allokazzjoni obbligatorja tal-fondi għal-LEADER/għas-CLLD għandha titkompla u tiġi estiża. Jekk il-LEADER/is-CLLD għandhom jibqgħu fi ħdan il-FAEŻR, nirrakkomandaw li l-Istati Membri jkunu meħtieġa (i) jallokaw porzjon minimu ta’ 10 fil-mija tal-finanzjament tal-Pilastru II tal-FAEŻR lil-LEADER/lis-CLLD u (ii) tal-anqas jaqblu ma’ din l-allokazzjoni permezz ta’ kofinanzjament nazzjonali. - L-aċċess għall-finanzjament LEADER għall-benefiċjarji jiġi ssimplifikat. - Il-metodoloġija LEADER (żvilupp minn isfel għal fuq u parteċipattiv) għandha tiġi integrata f’fondi oħra tal-UE, bil-ħsieb li jissaħħaħ l-appoġġ għaż-żoni urbani u żoni oħra li bħalissa mhumiex koperti mil-LEADER.