Cuireann daoine óga chun suntais go bhfuil a saol laethúil á mhúnlú ag an intleacht shaorga agus ag ardáin dhigiteacha, ach cuireann siad ábhair imní in iúl freisin maidir le hábhar míthreorach, an deacracht a bhaineann le hábhar a ghintear leis an intleacht shaorga a shainaithint, an doiléire idir an réaltacht agus an saol digiteach, chomh maith le hardáin a chuireann luach airgid ar shonraí agus ar aird úsáideoirí.  Léiríonn siad freisin na héifeachtaí diúltacha sóisialta a bhaineann le bheith ar líne, lena n-áirítear piarbhrú, féinchomparáid dhíobhálach, agus braistint faireachais atá ag dul i méid, in éineacht le spásanna atá ag éirí níos polaraithe agus a d’fhéadfadh rannpháirtíocht a dhíspreagadh.

Sin an fáth a n-iarrann siad rialáil níos láidre, trédhearcacht níos fearr, litearthacht dhigiteach níos fearr, agus níos mó cuntasachta ó chuideachtaí teicneolaíochta, ó rialtais agus ó na meáin. Leagtar béim iontu freisin ar an ngá atá le daoine óga a rannpháirtiú i ndearadh teicneolaíochta, spásanna ar líne atá níos sábháilte agus oiriúnach ó thaobh aoise de a chruthú, rialacha aoise íosta do na meáin shóisialta a mheas, agus tacú le forbairt seirbhísí digiteacha Eorpacha a léiríonn luachanna an Aontais. 

 Tá beartais agus tionscnaimh curtha i bhfeidhm ag an gCoimisiún Eorpach, amhail an Gníomh um Sheirbhísí Digiteacha, lena gceanglaítear ar ardáin rioscaí d’úsáideoirí, mionaoisigh san áireamh, a mhaolú, in éineacht leis an bPlean Gníomhaíochta i gcoinne na cibearbhulaíochta, arb é is aidhm dó timpeallachtaí níos sábháilte ar líne a chruthú do dhaoine óga. 

Bhí ábhair an phlé nasctha freisin leis an bPacáiste Ceannasachta Teicneolaíochta atá ar na bacáin arb é is aidhm dó teicneolaíochtaí Eorpacha a chur chun cinn, spleáchas na hEorpa ar ghníomhaithe nach gníomhaithe de chuid an Aontais iad a laghdú agus a chinntiú go n-urramófar caighdeáin agus prionsabail an Aontais.

An aontaíonn tú leis na bearta atá molta ag daoine óga? An bhfuil gníomhaíochtaí breise ba cheart don Aontas a mheas?